Hlaupabóla og fleira

Skrýtin vika að baki.
Ungfrúin á heimilinu fékk hita á fimmtudaginn og á föstudaginn fóru að koma bólur = hlaupabólan er mætt á svæðið. Svo núna er hún útsteypt í þessum ófögnuði og ég sé fram á að vera amk hálfa vikuna heima með hana. Hún er hundfúl yfir þessu, missti af danskennslu, danssýningu, leikskólaheimsókn og textílmennt (það var aðalmálið). En vonandi nær hún sér sem fyrst.

Við fórum síðasta sunnudag í pönnsukaffi á Sölvabakka, það voru hreppaskil og við máttum bíða eftir fé úr Skagafirði. Alltaf gott að koma í kaffi á Bakkann.

Svo þurfti endilega að fara að snjóa á þriðjudaginn var en svo var nú snjórinn að mestu farinn um hádegi á miðvikudeginum. En reyndar er spáð slyddu þessa vikuna :-( Eins gott að við ákváðum að fara með síðustu sláturlömbin í dag. Anna Magga kom og sónaði í gær og pabbi og Tómas komu og aðstoðuðu, þar sem ég og sjúklingurinn fórum ekki neitt. Ljómandi gott að það er afstaðið.

Nú líður að sumarlokum og fyrsti vetrardagur er á laugardaginn næsta. Þá ætlum við í kvenfélaginu Heklu að bjóða okkur og fjölskyldum okkar í kaffi.

Svo er víst sláturgerð á föstudaginn, ef veður leyfir. Enda eins gott, öll lifrarpylsan búin og endalaust verið að panta hana í morgunmat. Ekki hægt að segja annað en að hér sé hollur morgunmatur :-)

Hér eru svo myndir af nýjustu frænkunni minni, henni litlu Áróru. Þær eru á Króknum núna um helgina en ég kemst ekki , vegna hlaupabólunnar.............

Jæja, viðburðir vikunnar hafa víst ekki verið fleiri..............................